Татарстан Республикасы Мәдәният министрлыгында Беренче «Нәүрүз school» Халыкара студентлар спектакльләре (милли студияләр) фестивале (2019 елның 10-16 июне) буенча матбугат конференциясе узды.

Конференциядә Татарстан Республикасы мәдәният министры Ирада Әюпова, Г.Камал исемендәге Татар дәүләт Академия театрының баш режиссеры, Татарстанның Театр эшлеклеләре берлеге рәисе Фәрит Бикчәнтәев, Театр эшлеклеләре берлеге рәисе урынбасары, М.Сәлимҗанов исемендәге Актерлар йорты директоры Эльмира Фәтхуллина һәм Г.Камал исемендәге Татар дәүләт Академия театры директоры Илфир Якупов катнашты.

«Нәүрүз school» фестивале милли театр мәктәпләрендә белем алучы яшь белгечләрне тәкъдим итү, театраль уку йортлары педагогларына тәҗрибә уртаклашу мөмкинлеге булдыру һәм милли театр мәктәпләренең заман шартларындагы проблемаларына игътибарны арттыру максатыннан үткәрелә. «Нәүрүз school» фестивалендә К.Жургенев исемендәге Казах милли сәнгать академиясе (Алма-Ата), Әзербәйҗан Дәүләт Мәдәният һәм Сәнгать Университеты (Баку), Россия театр сәнгате институты (ГИТИС, Мәскәү), Арктик дәүләт мәдәният һәм сәнгать институты (Якутск), Уфа дәүләт сәнгать институты, Казан театр училищесы һәм башка уку йортлары студентларының спектакльләре тәкъдим ителә. Спектакльләрдән тыш Россиянең әйдәп баручы театр белгечләре мастер-класслар үткәрәчәк.

«Бүгенге көндә Татарстанның милли театрлары милли мәдәниятне саклау һәм үстерү үрнәге булып торалар: спектакльләр ана телендә бара, милли драматургия үсә, сәхнә гәүдәләнешенең яңа форматлары, формалары барлыкка килә, театр белгечләре көче белән милли театр мәктәбе традицияләре саклана, ә гастрольләр һәм театрларның зур фестивальләрдә катнашуы һөнәр осталыгының югары дәрәҗәдә икәнен күрсәтә. Кызганычка каршы, кайбер сәбәпләр аркасында, һәр этник регион да моңа сәләтле түгел. Шул нисбәттән, Татарстан Театр эшлеклеләре берлеге студентлар спектакльләрен күрсәтү буенча зур фестиваль оештыруны тәкъдим итте», - дип сөйләде фестивальнең сәнгать җитәкчесе Фәрит Бикчәнтәев.

«Нәүрүз school» фестивале спектакльләре Казанның 5 театраль мәйданында күрсәтеләчәк: Камал театрының Кече сәхнәсендә, “Әкият” курчак, Кариев яшь тамашачылар театрларында, М.Сәлимҗанов исемендәге Актерлар йорты һәм Учебный театр сәхнәләрендә. Фестивальне оештыручылар: Россия Федерациясе мәдәният министрлыгы ярдәме белән Татарстан Республикасы мәдәният министрлыгы, Россия Федерациясе Театр эшлеклеләре берлеге ярдәме белән Татарстан Республикасы Театр эшлеклеләре берлеге, Г.Камал исемендәге Татар дәүләт Академия театры.