Кичә, 13 ноябрьдә, М.Сәлимҗанов исемендәге Актерлар йортында театраль сезон ачылу уңаеннан STDance тематик кичәсе узды. Татарстанның Театр эшлеклеләре берлеге оештырган очрашу иҗади ярыш форматында үтте.

STDance бию конкурсы Казан, Минзәлә һәм Әтнә театрларының яшь артистларына хореография өлкәсендәге осталыкларын күрсәтү, ә мэтрларга лаеклы бәя бирү мөмкинлеге бирде.

Конкурста барлыгы тугыз коллектив көч сынады. Беренче булып үзенчәлекле канкан биюе белән "Әкият" курчак театры артистлары чыгыш ясады. Казан яшь тамашачылар театры (ТЮЗ) яшьләр тарафыннан башкарылган яшьләр өчен дәртле "Фанк" биюен тәкъдим итте. Минзәлә драма театры "Ак-кара" дип аталган лирик әдәби-бию номеры белән гаҗәпләндерде. Г.Камал театры тарафыннан әзерләнгән "Миркәй белән Айсылу" спектакленә фантазия залны таң калдырды. Негр хатын-кызлары булып грим салган, чәчәкле юбкалар һәм ясалма күкрәкләр кигән актрисалар шундый оста итеп биеделәр ки, спектакльне әлегә кадәр күрмәгән кешеләр тиз арада аны карарга кирәк дигән фикергә килделәр.

Атаклы опера җырчысы Венера Ганиева, Камал театрының әдәби бүлек мөдире Нияз Игъламов һәм республиканың башка күренекле театр эшлеклеләре кергән жюри составы кичәнең ахырында җиңүчеләрне билгеләде.

Беренче урынны лаеклы рәвештә Камал театры, икенче урынны - Әтнә театры, ә өченче урынны - Болактагы яшьләр театры яулады.