14 һәм 15 декабрьдә Нанкин шәһәрендә (Кытай Халык Республикасы) Г.Камал исемендәге Татар дәүләт Академия театры Сөмбел Гаффарова пьесасы буенча Фәрит Бикчәнтәев сәхнәләштергән "Килмешәк" спектаклен тәкъдим итә. Спектакль Ибсен Халыкара институты һәм дөньядагы иң борынгы университетларның берсе - Нанкин университеты оештырган "Күчеп йөрүче дөньялар" фестивале кысаларында уйнала.

Спектакльләрдән тыш, фестиваль көннәрендә Нанкин университеты студентлары һәм форумда катнашучылар өчен Камал театрының баш режиссеры Фәрит Бикчәнтәев лаборатория үткәрәчәк. Ә Камал театры директоры Илфир Якупов түгәрәк өстәлдә катнашачак. 

"Килмешәк" мистик драмасы - 2010 елда сәнгать өлкәсендәге халыкара бәйләнешләрне үстерү максатыннан Ibsen International Норвегия оешмасы үткәргән лабораториядә язылды. Әлеге лабораториядә берничә тема тәкъдим ителде: кеше хокуклары, әйләнә-тирә дөньяны саклау, шәхес иреге, ришвәтчелеккә каршы көрәш. Семинарда конкурста сайлап алынган төрле илләрдән сигез автор катнашты: Италия, КАР, АКШ, Норвегия, Кытай. Дәресләр 3 ел дәвамында Кытайда - Пекин,  Шанхай, Гуанчжоу шәһәрләрендә үтте. Лабораториядә Россиядән драматург Сөмбел Гаффарова катнашты. Проект кысаларында авторлар миграция, кешеләрне мәҗбүриләп күчендерү турында инглиз телендә пьесалар яздылар.

Спектакль эскизлары work-in-progress форматында Норвегияның Трёмсе шәһәрендә 2017 елның язында Арктик театрында "Обезьяна в Гималаях" исемле альманах рәвешендә тәкъдим ителде. Г.Камал театрында "Килмешәк спектакле премьерасы 2017 елның 14 октябрендә үтте.  Проектның кураторлары: Словениядән драма буенча белгеч Вилма Штритоф, Ibsen International сәнгать җитәкчесе һәм драматург Италиядан Фабрицио Массини һәм Ibsen International директоры һәм режиссеры Норвегиядән Ингер Буресунд.